Journal Charter

ივანე ჯავახიშვილის სახელობის თბილისის სახელმწიფო უნივერსიტეტის

,,სამართლის ჟურნალის“  

დებულება

თავი I. ზოგადი დებულებები

მუხლი 1. ჟურნალის სტატუსი

  1. ივანე ჯავახიშვილის სახელობის თბილისის სახელმწიფო უნივერსიტეტის (შემდგომში - თსუ) ,,სამართლის ჟურნალი“ (შემდგომში - ჟურნალი) არის სრული ღია წვდომის ორენოვანი, საერთაშორისო რეფერირებადი და რეცენზირებადი პერიოდული ჟურნალი, რომელიც გამოიცემა თსუ-ის იურიდიული ფაკულტეტის მიერ.
  2. ქართულენოვანი ჟურნალი დაფუძნდა 2009 წელს, 2011 წლიდან ჟურნალი გამოიცემა ქართულ და ინგლისურ ენებზე.
  3. ჟურნალის სახელწოდებაა ქართულ ენაზე - ,,სამართლის ჟურნალი“, ინგლისურ ენაზე - “Journal of Law”.
  4. ჟურნალის პერიოდული გამოცემის საერთაშორისო სტანდარტული სერიული ნომერია (ISSN), ბეჭდური: 1987-7668, ელექტრონული: 2720-782X.
  5. ჟურნალი, წელიწადში ორჯერ ქართულენოვან და ინგლისურენოვან დამოუკიდებელ გამოცემებად ქვეყნდება ელექტრონული და ბეჭდური სახით.
  6. ჟურნალის ყველა ელექტრონული გამოცემა ღიად ხელმისაწვდომია ნებისმიერი მკითხველისთვის. დაინტერესებულ პირს აქვს უფლება ვებგვერდზე რეგისტრაციის გარეშე უსასყიდლოდ გაეცნოს ჟურნალის მასალას, ჩამოტვირთოს, გადაიღოს ასლი, მართლზომიერი გზით გაავრცელოს და მოახდინოს სათანადო სამეცნიერო ციტირება საავტორო უფლებების დაცვით.
  7. ჟურნალის გამომცემელია ,,ივანე ჯავახიშვილის სახელობის თბილისის სახელმწიფო უნივერსიტეტის გამომცემლობა“.
  8. წინამდებარე დებულება პროაქტიულად უნდა გამოქვეყნდეს ჟურნალის ოფიციალურ ვებ-გვერდზე https://jlaw.tsu.ge/index.php/JLaw

მუხლი 2. ჟურნალის მიზანი, დარგობრივი მიმართულება და ამოცანები

1. ჟურნალი მიზნად ისახავს სამართლის ყველა დარგობრივი მიმართულებით შედარებითსამართლებრივი კვლევების პუბლიცირების გზით დინამიური და ინტერნაციონალური სამეცნიერო პლატფორმის ჩამოყალიბებას და სამეცნიერო დისკურსის გაფართოებას ტრანსნაციონალურ კონტექსტში.

2. ზემოაღნიშნული მიზნის მისაღწევად ჟურნალის რედაქცია ახორციელებს:

ა) ჟურნალის სამეცნიერო სტატუსის ამაღლების, საერთაშორისო სამეცნიერო ბაზებში მისი ინტეგრირებისა და კვლევების ინტერნაციონალიზაციის ხელშეწყობას;

ბ) უცხოელი და ქართველი მეცნიერ-მკლევარების  ეფექტიანი სამეცნიერო თანამშრომლობისა და საკომუნიკაციო პლატფორმის ჩამოყალიბებას;

გ) კვლევითი მიმართულებების იდენტიფიცირებას და შესაბამისი დარგის ექსპერტების - ავტორებისა და რეცენზენტების მოზიდვას;

დ) საერთაშორისო საგამომცემლო სტანდარტებთან ჟურნალის საგამომცემლო პოლიტიკის თანმიმდევრულ  ჰარმონიზებას;

ე) ჟურნალის რეგულარულ გავრცელებას (ბეჭდურ-ელექტრონული ფორმით) ქართულ და უცხოურ აკადემიურ და პროფესიულ წრეებში, სამეცნიერო-საბიბლიოთეკო სივრცეებში.

თავი II. ჟურნალის მართვა და სარედაქციო  უფლებამოსილების დადგენის წესი

მუხლი 3. ჟურნალის რედაქცია

1. ჟურნალის რედაქციის შემადგენლობაშია:

 ა) მთავარი რედაქტორი;

 ბ) მმართველი რედაქტორი;

გ) სარედაქციო კოლეგია.

2. ჟურნალს ტექნიკურ-საგამომცემლო უზრუნველყოფისთვის ემსახურება  დამხმარე სარედაქციო პერსონალი: ენობრივი კორექტორი, დამკაბადონებელი და სხვა.

მუხლი 4. მთავარი რედაქტორი

1. მთავარ რედაქტორს ირჩევს თსუ-ის იურიდიული ფაკულტეტის საბჭო ჟურნალის სარედაქციო საქმიანობისა და მართვის გამოცდილების, სამეცნიერო მიღწევებისა და მათი საერთაშორისო აღიარების, იურიდიული ფაკულტეტის მიმართ აკადემიური დამსახურების გათვალისწინებით. მთავარი რედაქტორის უფლებამოსილება გრძელდება იურიდიული ფაკულტეტის საბჭოს მიერ მთავარი რედაქტორის უფლებამოსილების შეწყვეტამდე;

2. მთავარი რედაქტორი:

ა) საერთო ხელმძღვანელობას უწევს და წარმართავს ჟურნალის საგამომცემლო და სამეცნიერო-განმავითარებელ პოლიტიკას;

ბ) ადგენს ნაშრომის შერჩევის კრიტერიუმებსა და ჟურნალის აკადემიურ (მათ შორის ციტირების) სტანდარტებს მმართველი რედაქტორის წარდგინების  საფუძველზე;

გ) რეცენზენტების შეფასების საფუძველზე,  მმართველი რედაქტორის მიერ მომზადებული წარდგინების გათვალისწინებით, აფასებს საჟურნალო ნაშრომების გამოქვეყნების საკითხს და წარუდეგენს მათ სარედაქციო კოლეგიას გამოქვეყნების თაობაზე საბოლოო გადაწყვეტილების მიღების მიზნით;

დ)  განსაზღვრავს  ჟურნალის სამეცნიერო მიმართულებებსა და რუბრიკებს;

ე) განსაზღვრავს ჟურნალის  სარედაქციო კოლეგიის შემადგენლობას და მის ცალკეულ წევრთა ფუნქციურ უფლებამოსილებას;

ვ) იწვევს და თავმჯდომარეობს სარედაქციო კოლეგიის სხდომებს და განსაზღვრავს კოლეგიის სხდომაზე გადაწყვეტილების მიღების წესს;

ზ) სარედაქციო კოლეგიის წევრთაგან წარუდგენს იურიდიული ფაკულტეტის დეკანს მმართველი რედაქტორის კანდიდატურას  თანამდებობაზე დასანიშნად, განსაზღვრავს მის ფუნქციურ უფლებამოსილებას და, საჭიროების შესაბამისად, აკისრებს მას კონკრეტულ სარედაქციო დავალებას;

თ) რეკომენდაციით მიმართავს იურიდიული ფაკულტეტის საბჭოს  ჟურნალის ცალკეული ავტორისათვის თსუ-ის ბიუჯეტიდან ჰონორარის გაცემის თაობაზე;

ი) იღებს  ჟურნალის ცალკეული ან ყველა ნაშრომის თსუ-ის  ბიუჯეტის დაფინანსებით ინგლისურ ენაზე თარგმნის შესახებ გადაწყვეტილებას;

კ) ახორციელებს ჟურნალის სხვა მმართველობით ფუნქციებს და წარმომადგენლობით უფლებამოსილებას მესამე პირებთან ურთიერთობაში.  

მუხლი. 5 მმართველი რედაქტორი

მმართველი რედაქტორი:

ა) მმართველი რედაქტორი პასუხისმგებელია ჟურნალის საერთო სამეცნიერო ხარისხსა და რედაქციული საქმიანობის დადგენილი სტანდარტების შესაბამისად წარმართვაზე;

ბ) მმართველ რედაქტორს, რომელიც იმავდროულად არის სარედაქციო კოლეგიის წევრი, მთავარი რედაქტორის წარდგინებით ნიშნავს თსუ იურიდიული ფაკულტეტის დეკანი. მმართველი რედაქტორის უფლებამოსილება გრძელდება იურიდიული ფაკულტეტის დეკანის მიერ მმართველი რედაქტორისთვის უფლებამოსილების შეწყვეტამდე. მმართველ რედაქტორს უნდა ჰქონდეს სამეცნიერო ჟურნალის საქმიანობაში სათანადო გამოცდილება;

გ) ახორციელებს ჟურნალის დარგობრივი მიმართულებებით გამოცდილი მკვლევარების მოზიდვას და გამოცემების პოპულარიზაციას აკადემიურ-პროფესიულ წრეებში;

დ) სარედაქციო კოლეგიის დახმარებით და რეკომენდირებით ახდენს კომპეტენტური რეცენზენტების შერჩევას, მოწვევას და ასავე ახორციელებს სარეცენზიო საქმიანობის შინაარსობრივ-ორგანიზაციულ წარმართვას;

ე) წარმართავს და უზრუნველყოფს ჟურნალის გეგმაზომიერ ოპერაციულ საქმიანობას, საგამომცემლო ვადების კონტროლს, დათქმულ ვადებში საჟურნალო ნაშრომთა კონკურსის გამოცხადებას  და მიღების პროცედურებს;

ვ) რეცენზენტების დასკვნების საფუძველზე  წარმართავს ავტორებთან კომუნიკაციასა და კოორდინირებას უწევს რედაქციული შენიშვნების გასწორებას, ისევე როგორც უფლებამოსილია თავად უზრუნველყოს ნაშრომების სამეცნიერო რედაქტირება სარედაქციო კოლეგიის მიერ ნაშრომების გამოქვეყნების საკითხის გადაწყვეტამდე;

ზ) მეცნიერული თვალსაზრისით აფასებს ნაშრომებში ავტორთა მიერ რეცენზენტების რეკომენდაციების გათვალისწინების ხარისხს;

თ) საჭიროების შემთხვევაში რეცენზენტებთან და ავტორებთან მჭიდრო კომუნიკაციის ფარგლებში თავად ახორციელებს ნაშრომის სამეცნიერო-ტექნიკურ რედაქტირებას;

ი) რეცენზენტების დასკვნების საფუძველზე ამზადებს წარდგინებას მთავარი რედაქტორისთვის  ნაშრომთა გამოქვეყნების საკითხის შეფასებისა და სარედაქციო კოლეგიისთვის საბოლოო გადაწყვეტილების მისაღებად შემდგომი წარდგენის მიზნით;

კ) მონაწილეობს სარედაქციო კოლეგიის სხდომებში, ხოლო ნაშრომების ბეჭდვის თაობაზე სარედაქციო კოლეგიის მიერ გადაწყვეტილების მიღების დროს სარგებლობს მხოლოდ  სათათბირო ხმის უფლებით;

ლ) შეიმუშავებს ნაშრომის შერჩევის კრიტერიუმებსა და ჟურნალის აკადემიურ (მათ შორის ციტირების) სტანდარტებს და წარუდგენს მთავარ რედაქტორს დასამტკიცებლად;

მ) წელიწადში ერთხელ წარადგენს საქმიანობის წერილობით ანგარიშს მთავარი რედაქტორის სახელზე;

ნ) მთავარი რედაქტორის დავალებით ასრულებს სხვა სარედაქციო უფლებამოსილებას.

მუხლი 6. სარედაქციო კოლეგია

1.სარედაქციო კოლეგია არის ჟურნალის კოლეგიალური ორგანო, რომელსაც ხელმძღვანელობს მთავარი რედაქტორი.

2. სარედაქციო კოლეგიის წევრებს იწვევს და მათ ფუნქციურ უფლებამოსილებას განსაზღვრავს მთავარი რედაქტორი.

3. სარედაქციო კოლეგიის წევრები შეიძლება იყვნენ საქართველოს და უცხოური უნივერსიტეტების, სამეცნიერო-კვლევითი ინსტიტუტების ან სამართლის პრაქტიკის სფეროს კვალიფიციური წარმომადგენლები ჟურნალის დარგობრივ სფეროებში.

4.სარედაქციო კოლეგიის სხდომებს იწვევს, თავმჯდომარეობს და სხდომაზე გადაწყვეტილების მიღების წესს განსაზღვრავს მთავარი რედაქტორი.

5. სარედაქციო კოლეგია:

ა) მთავარი რედაქტორის წარდგინებით იღებს საბოლოო გადაწყვეტილებას საჟურნალო ნაშრომების გამოქვეყნების თაობაზე;

ბ) მთავარი რედაქტორის წარდგინებით  მსჯელობს ჟურნალის განვითარების დარგობრივ მიმართულებებზე, სამეცნიერო-კვლევით პრიორიტეტებზე, სპეციალური გამოცემის საკითხის გადაწყვეტაზე;

ბ) ხელს უწყობს ცნობილი მკვლევარების მოზიდვას და ჟურნალის პოპულარიზაციას საერთაშორისო სამეცნიერო წრეებში;

გ) მთავარი და მმართველი რედაქტორების მიმართვის საფუძველზე გასცემს სარეკომენდაციო მოსაზრებებს ჟურნალის განვითარების ცალკეულ მიმართულებებზე.

თავი III. ნაშრომის გამოსაქვეყნებლად წარდგენის წესი და რეცენზირების პროცედურა

მუხლი 7. ჟურნალში გამოსაქვეყნებელი ნაშრომის სახეები

1. სამართლის სხვადასხვა დარგობრივი მიმართულებით ჟურნალში გამოსაქვეყნებლად შესაძლებელია წარდგენილ იქნეს შემდეგი ტიპის ნაშრომები:

ა) სამეცნიერო სტატია;

ბ) აკადემიური მიმოხილვა (რეცენზია);

გ) სამართლის პრაქტიკის ანალიზი;

დ) უცხოენოვანი სამეცნიერო პუბლიკაციის თარგმანი.

2. ჟურნალის მთავარი რედაქტორის გადაწყვეტილებით შესაძლებელია განხორციელდეს რუბრიკების შეცვლა, განვრცობა-შემცირება.

მუხლი 8. ჟურნალში ნაშრომის გამოქვეყნების საფუძველი

1. ჟურნალში ნაშრომის გამოქვეყნება შესაძლებელია:

ა) კონკურსის წესით;

ბ) ჟურნალის სარედაქციო შემადგენლობის წევრის მიერ ავტორის სპეციალური მოწვევის საფუძველზე.

ნაშრომის გამოსაქვეყნებლად მიღების შემთხვევაში, იგი ექვემდებარება ამავე დებულებით დადგენილი რეცენზირების პროცედურას.

მუხლი 9. საჟურნალო ნაშრომების კონკურსი

  1. ჟურნალში გამოსაქვეყნებელი ნაშრომების კონკურსის შესახებ ინფორმაცია ცხადდება ჟურნალისა და თსუ-ის იურიდიული ფაკულტეტის ოფიციალურ ვებგვერდებზე. 
  2. ნაშრომების კონკურსის გამოცხადება ხორციელდება წელიწადში ორჯერ, იანვარსა და ივლისში. ობიექტური სარედაქციო საჭიროების გათვალისწინებით, შესაძლებელია კონკურსის გამოცხადების წესის ცვლილება ჟურნალის წლიური პერიოდულობის შენარჩუნებით.

მუხლი 10. ნაშრომის გამოსაქვეყნებლად  წარდგენაზე უფლებამოსილი პირები

1. ნაშრომის გამოსაქვეყნებლად წარდგენის უფლებამოსილებით სარგებლობენ შემდეგი პირები:

ა) თსუ-ის იურიდიული ფაკულტეტის, საქართველოს უმაღლესი საგანმანათლებლო დაწესებულებების, ასევე უცხოური საუნივერსიტეტო და სამეცნიერო-კვლევითი ცენტრების  პროფესორ-მასწავლებლები, მოწვეული პედაგოგები, დამოუკიდებელი მკვლევარები, დოქტორანტები;

ბ)  სამართლის სფეროში მოღვაწე უცხოელი და ქართველი პრაქტიკოსი იურისტები;

გ) სხვა ავტორები, რომლებიც  ჟურნალის სარედაქციო შემადგენლობის წევრის თხოვნის/მოწვევის საფუძველზე  მოამზადებენ პუბლიკაციებს სამართლის მეცნიერებისა და პრაქტიკის აქტუალურ საკითხებზე.

2. ნაშრომი შესაძლებელია წარდგენილ იქნეს როგორც ინდივიდუალურად, ისე თანაავტორობით.

მუხლი 11. გამოსაქვეყნებად ნაშრომის  წარდგენის წესი და დოკუმენტაცია

1. ჟურნალში შესაძლებელია წარდგენილ იქნეს ავტორისეული, ავთენტური კვლევა მხოლოდ  მისი პირველადი პუბლიცირების მიზნით.

2. ნაშრომი არ მიიღება ჟურნალში გამოსაქვეყნებლად თუ მისი არსებითი ნაწილი ან სრული ვერსია გამოქვეყნებულია ან უკვე წარდგენილია სხვა სამეცნიერო გამოცემაში  პუბლიცირების მიზნით.

3. ავტორი ჟურნალში გამოსაქვეყნებლად წარადგენს სამეცნიერო სტატიის ქართულენოვან და ინგლისურენოვან ვერსიას, რომელიც  შესრულებულ უნდა იქნეს მაღალი ლინგვისტური სტანდარტების დაცვით. ამასთან, ქართულ ენაზე შესაძლებელია წარდგენილ იქნეს უცხოენოვანი ნაშრომის თარგმანი.  სამართლის პრაქტიკის ანალიზი და აკადემიური მიმოხილვა (რეცენზია) გამოსაქვეყნებლად შეიძლება წარდგენილ იქნეს როგორც ქართულ, ისე ინგლისურ ენაზე ავტორის სურვილისამებრ.

4. ჟურნალის მთავარი რედაქტორი უფლებამოსილია, მიიღოს ჟურნალის ცალკეული ან ყველა ნაშრომის თსუ-ის ბიუჯეტის დაფინანსებით ინგლისურ ენაზე თარგმნის შესახებ გადაწყვეტილება.

5. ავტორმა ჟურნალის ელექტრონულ მისამართზე (journal@tsu.ge) გამოსაქვეყნებლად უნდა წარადგინოს შემდეგი დოკუმენტაცია:

 ა) ნაშრომი (სრული ტექსტი ქართულ და ინგლისურ ენებზე), რომლის  მოცულობა არ უნდა აღემატებოდეს 7000 (შვიდი ათას) ნაბეჭდ სიტყვას (ანოტაციის, ძირითადი ტექსტისა და სქოლიოების ჩათვლით);  

ბ) ანოტაცია (ქართულ და ინგლისურ ენებზე) არაუმეტეს 300 (სამასი) სიტყვისა;

გ) საკვანძო სიტყვები (არაუმეტეს 10 (ათი)) (ქართულ და ინგლისურ ენებზე);

 დ) ბიბლიოგრაფია (ქართულენოვანი და ინგლისურენოვანი ნაშრომისთვის ცალ-ცალკე) მისი  შედგენის წესის (დანართი №1)  შესაბამისად;

 ე) განცხადება მთავარი რედაქტორის სახელზე ავტორის ხელმოწერით (განცხადების ფორმა - დანართი №2);

ვ) დოქტორანტის შემთხვევაში, სამეცნიერო ხელმძღვანელის დადებითი დასკვნა;

ზ) ნაშრომის კვლევის სფეროში გამოჩენილი სამართლის სპეციალისტის კვალიფიციური რეცენზია ნაშრომის სამართლის დოქტორის ხარისხის არმქონე პირის მიერ წარმოდგენის შემთხვევაში.

6. დებულების მე-12 მუხლის მე-5 პუნქტით დადგენილი მოთხოვნები შეიძლება შეიცვალოს მთავარი რედაქტორის გადაწყვეტილებით.

7. ავტორი ვალდებულია მკაცრად დაიცვას ჟურნალის ციტირების აკადემიური სტანდარტი (დანართი №3).

8. ნაშრომის ტექსტი შესრულებული უნდა იყოს  Sylfaen_12  ფონ­ტით,  სქოლიო - Sylfaen_10  ფონ­ტით, სტრიქონებს შო­რის დაშორება - ერთი ინტერვალი.

9. წინამდებარე დებულებითა და ციტირების წესით დადგენილი მოთხოვნების დაუცველად წარმოდგენილი ნაშრომის გამოქვეყნების საკითხი არ განიხილება. შესაბამისად,  არ შემოწმდება პლაგიატის პროგრამაში და არ დაექვემდებარება რეცენზირების პროცედურას.

მუხლი 12. ნაშრომის პირველადი შერჩევა და რეცენზირების პროცედურა

  1. აკადემიური ნაშრომის წარმოდგენის შემდეგ, ჟურნალის რედაქტორების მიერ ფასდება მისი შესაბამისობა ფორმალური დასაშვებობის მოთხოვნებთან, ციტირების სტანდარტთან, ჟურნალის სარედაქციო პოლიტიკასთან, მიზნებთან და თემატიკასთან.
  2. პირველადი დასაშვებობის ეტაპის წარმატებით გავლის შემდეგ ნაშრომი მოწმდება პლაგიატზე.
  3. პლაგიატზე შემოწმების შედეგების გათვალისწინებით, ნაშრომი ეგზავნება 2 (ორ) რეცენზენტს. რეცენზირების პროცესში შეძლებისდაგვარად უნდა იქნეს უზრუნველყოფილი 1 უცხოელი და 1 ადგილობრივი ექსპერტის მონაწილეობა.
  4. რეცენზენტი შეირჩევა დარგობრივი კომპეტენციის მიხედვით და იგი შეიძლება იყოს პირი, რომელსაც აქვს შესაბამისი (პრაქტიკული ან/და კვლევითი) გამოცდილება/კვალიფიკაცია შესაფასებელი ნაშრომის კვლევის სფეროში.
  5. რეცენზენტების ვინაობა ანონიმურია, ერთი მხრივ, ავტორისთვის, მეორე მხრივ, თავად შერჩეული რეცენზენტებისთვის. რეცენზენტების ანონიმურობა უზრუნველყოფილი და დაცულია, როგორც რეცენზირების პროცესში, ისე მისი დასრულების შემდეგ. 
  6. სამეცნიერო ნაშრომის დროული შეფასების შეუძლებლობა ან შესაბამისი დარგობრივი კომპეტენციის არქონა, საჭიროებს რეცენზენტის მიერ მმართველი რედაქტორის წერილობით ინფორმირებას გონივრულ ვადაში.
  7. რეცენზენტები ხელმძღვანელობენ ნაშრომის შეფასების დადგენილი კრიტერიუმებით და შეფასების წერილობით ანგარიშს (ფარული რეცენზირების ანგარიშის ფორმა - დანართი №4) წარუდგენენ მმართველ რედაქტორს გამოსასწორებელი ხარვეზების შესახებ ავტორების შემდგომი ინფორმირების მიზნით.
  8. რეცენზენტი უფლებამოსილია, სარეცენზიო საქმიანობის ეფექტიანად წარმართვის მიზნით, ცალკეული რჩევით მიმართოს ჟურნალის რედაქტორებს, რაც არ ჩაითვლება შეფასების დამოუკიდებლობისა და მიუკერძოებლობის პრინციპთა დარღვევად.
  9. რეცენზენტების მიერ შესაძლებელია გაიცეს ერთ-ერთი შემდეგი რეკომენდაცია:

        ა) ნაშრომი შესაძლებელია გამოქვეყნდეს სამეცნიერო ჟურნალში არაარსებითი ტექნიკურ-შინაარსობრივი რედაქტირების შემდეგ;

      ბ) ნაშრომი მოითხოვს არსებით რედაქტირებას გამოქვეყნებამდე;

      გ) ნაშრომი არ ექვემდებარება გამოქვეყნებას.

  1. რეცენზენტის მიერ გაცემული ხარვეზის გამოსწორების რეკომენდაცია საჭიროებს შესაბამისი მითითებებისა და განმარტებების დართვას  შეფასებულ  ნაშრომზე.
  2. თუ ნაშრომის გამოქვეყნებაზე რეცენზენტების მიერ გაიცა ნაშრომში ხარვეზის გამოსწორების რეკომენდაცია, მმართველი რედაქტორი წარმართავს ავტორთან  კომუნიკაციასა და კოორდინირებას უწევენ ავტორის მიერ ხარვეზის  გასწორების პროცესს.
  3. მმართველი რედაქტორის მიერ ფასდება ნაშრომში ავტორის მიერ რეცენზენტების რეკომენდაციის გათვალისწინების ხარისხი.
  4. რეცენზენტების დასკვნების საფუძველზე მმართველი რედაქტორი ამზადებს წარდგინებას მთავარი რედაქტორისთვის ნაშრომთა გამოქვეყნების საკითხის შეფასებისა და სარედაქციო კოლეგიისთვის საბოლოო გადაწყვეტილების მისაღებად შემდგომი წარდგენის მიზნით.
  5. მთავარი რედაქტორის გადაწყვეტილებით, ჟურნალის გამოცემის პერიოდულობის დაცვის უზრუნველსაყოფად, ნაშრომი შესაძლებელია გამოქვეყნდეს ჟურნალის მომდევნო ნომერში იმ შემთხვევაში, თუ რეცენზენტთა ხარვეზების გასწორება დაკავშირებულია ხანგრძლივ დროსთან, რამაც შეიძლება შეაფერხოს ჟურნალის დროული გამოცემა ან არსებობს ნაშრომის მომდევნო ნომერში გამოქვეყნების სხვა ობიექტური საფუძველი.
  6. ნაშრომის გამოქვეყნებაზე უარის თქმის შემთხვევაში, ავტორს, მისი მოთხოვნის საფუძველზე, რეცენზენტთა ანონიმურობის პრინციპის დაცვით, ეგზავნება რეცენზენტების დასკვნა.

მუხლი 13. თანხმობა ნაშრომის გამოქვეყნებაზე      

  1. ჟურნალის კონკრეტულ ნომერში ნაშრომის გამოქვეყნებაზე რედაქციის თანხმობა გულისხმობს ნაშრომის უცვლელად ან ავტორის მიერ ან/და მისივე თანხობით, რეცენზენტებისა და რედაქტორთა რეკომენდაციების გათვალისწინებით, რედაქტირებული  ცვლილება-დამატებებით ნაშრომის პუბლიკაციას. 
  2. გამოქვეყნებაზე ავტორის ინფორმირება ხორციელდება მმართველი რედაქტორის მიერ წერილობით, ჟურნალის ოფიციალური ელექტრონული ფოსტის საშუალებით.
  3. ნაშრომის გამოქვეყნებაზე  ოფიციალური დასტური, ავტორის მოთხოვნის საფუძველზე, შესაძლებელია გაიცეს ასევე ცნობის სახით.
  4. ნაშრომის გამოქვეყნების თაობაზე ავტორის მიერ მესამე პირთა წინაშე განზრახ არასწორი ინფორმაციის წარდგენისთვის  პასუხისმგებელია ავტორი.

თავი IV. ეთიკის პრინციპები ჟურნალის საგამომცემლო პროცესში

მუხლი 14. სტანდარტის რეგულირების სფერო

  1. ჟურნალის საგამომცემლო საქმიანობა წარიმართება ეთიკის სახელმძღვანელო პრინციპების შესაბამისად, რომელიც მოქმედებს ავტორთა, რედაქტორთა, სარედაქციო კოლეგიის წევრთა, დამხმარე სარედაქციო პერსონალის წევრთა და რეცენზენტთა მიმართ.
  2. ჟურნალის ეთიკის პრინციპების განსაზღვრა მიზნად ისახავს  საგამომცემლო პროცესის წარმართვას აკადემიური კეთილსინდისიერებისა და ეთიკის შესაბამისად, საგამომცემლო პროცესის მონაწილე პირთა არაეთიკური ქცევის პრევენციას და აღკვეთას გამოვლენილ დარღვევებზე დროული რეაგირების უზრუნველყოფით. 

მუხლი 15. საგამომცემლო საქმიანობის პრინციპები

  1. ჟურნალი აღიარებს აკადემიური გამოხატვის თავისუფლებას და საგამომცემლო საქმიანობას წარმართავს ჟურნალის სარედაქციო პოლიტიკის, დამოუკიდებლობის, სამართლიანობის, მიუკერძოებლობის, ინტერესთა კონფლიქტის აკრძალვის, კონფიდენციალობის, აკადემიური კეთილსინდისიერებისა და კომპეტენტურობის პრინციპთა დაცვით, რეცენზენტთა ორმხრივად ფარული შეფასების წესის უზრუნველყოფით.
  2. სარედაქციო გადაწყვეტილების, მათ შორის, ნაშრომის  გამოქვეყნების შესახებ გადაწყვეტილების, მიღებისას სარედაქციო საქმიანობაში მონაწილე პირების მხრიდან არსებული ინტერესთა კონფლიქტი გაცხადებულ უნდა იქნეს წინსწრებით, ხოლო აღნიშნულის შეუძლებლობის შემთხვევაში ინტერესთა  კონფლიქტის გამოვლენისთანავე.
  3. საგამომცემლო საქმიანობაში მონაწილე პირების მიერ ჟურნალში გამოსაქვეყნებლად ნაშრომის წარდგენის შემთხვევაში, ნაშრომის განხილვისა და გამოქვეყნების შესახებ გადაწყვეტილების პროცესი წარიმართება ამ  პირთა  მონაწილეობის გარეშე. 
  4. საგამომცემლო პროცესში ჩართულმა პირებმა არ უნდა გაამჟღავნონ სარედაქციო საქმიანობასთან დაკავშირებული ინფორმაცია მესამე პირებთან იმ ფარგლებით, რაც აუცილებელია წინამდებარე დებულებით დადგენილი წესებისა და პროცედურის  შესაბამისად სარედაქციო საქმიანობის  უზრუნველსაყოფად.
  5. ნაშრომის შეფასების პროცესში რეცენზენტი უფლებამოსილია,  ნაშრომთა ფარული შეფასების პრინციპის დაცვით, კითხვებით მიმართოს რედაქტორს/რედაქტორებს, რაც არ მიიჩნევა დამოუკიდებლობის, მიუკერძოებლობისა, კომპეტენტურობისა და კონფიდენციალობის პრინციპთა დარღვევად.
  6. საგამომცემლო საქმიანობაში უფლებამოსილ პირთა მონაწილეობა ემყარება კომპეტენტურობის პრინციპს. თუ ცალკეული ნაშრომის სარედაქციო უზრუნველყოფის პროცესში  შესაბამისი უფლებამოსილი პირის მხრიდან გამოვლინდება დარგობრივი ან/და დაკისრებული მოვალეობის შესაბამისი სხვა კომპეტენციის ნაკლებობა, აღნიშნულის შესახებ აუცილებელია ერთ-ერთი უფლებამოსილი რედაქტორის დროული ინფორმირება.
  7. საგამომცემლო საქმიანობაში ჩართულ პირებს ეკრძალებათ გამოსაქვეყნებლად წარდგენილი ნაშრომის შინაარსის, კვლევის ან მისი ნაწილის მითვისება, გადამუშავება ან/და პირადი ინტერესებისათვის სხვაგვარი არამართლზომიერი გამოყენება.

მუხლი 16.  საავტორო უფლებები

  1. ნაშრომის ავტორი ჟურნალს  საავტორო უფლებებს გადასცემს იმ ფარგლებით, რაც აუცილებელია ნაშრომის საგამომცემლო უზრუნველყოფისთვის, მ/შ სამეცნიერო-ტექნიკური რედაქტირების, ბეჭდური და ელექტრონული წესით გამოქვეყნების, თარგმნის, ვიზუალური გადამუშავების მიზნით.
  2. ჟურნალში გამოქვეყნებული ნაშრომების ავტორებს  მათ ნაშრომებზე რჩებათ არაქონებრივი საავტორო უფლებები.
  3. ავტორს უნარჩუნდება ნაშრომის გადამუშავებისა და შემდგომი რეპროდუცირების უფლება ჟურნალის, როგორც პირველადი გამოქვეყნების წყაროს, გამოხატული მითითებით.
  4. თანაავტორობით წარდგენილი ნაშრომის შემთხვევაში, ავტორები მათი სამეცნიერო ხარისხისა და თუ წოდების, ნაშრომში განხორციელებული კვლევის მოცულობისა და ფარგლების მიუხედავად, იზიარებენ თანაბარ პასუხისმგებლობას ნაშრომის შინაარსობრივ მხარესა და აკადემიურ კეთილსინდისერებაზე.
  5. ნაშრომი შეიძლება გამოქვეყნდეს ფსევდონიმით. თუმცა დაუშვებელია კვლევის  გამოსაქვეყნებლად წარდგენა ანონიმურად, მხოლოდ ფსევდონიმის გამოყენებით.
  6. პირის ან პირთა წრის ავტორად ან თანაავტორებად აღნიშვნა გულისხმობს გამოსაქვეყნებლად წარდგენილი  ნაშრომის მათ მიერ შესრულებას, ვიდრე არ იარსებებს საწინააღმდეგო დასაბუთება.

მუხლი 17. ნაშრომის შინაარსი  და აკადემიური თავისუფლების ფარგლები

  1. გამოსაქვეყნებლად წარდგენილი ნაშრომი შესრულებულ უნდა იქნეს აკადემიური კეთილსინდისიერების დაცვით, შეესაბამებოდეს ჟურნალის აკადემიურ სტანდარტს და სარედაქციო პოლიტიკას, რაზეც პასუხისმგებელია ავტორი.
  2. ჟურნალის დარგობრივი მიმართულებისა და აკადემიური თავისუფლების ფარგლებში, ავტორს უფლება აქვს დამოუკიდებლად განსაზღვროს სამეცნიერო ნაშრომის კვლევის თემატიკა.
  3. სამეცნიერო ნაშრომი არ უნდა შეიცავდეს დისკრიმინაციულ ტექსტს, სიძულვილის ენას, არაეთიკურ შეფასებებსა და შეურაცხყოფელ/დამაკნინებელ მოსაზრებებს, პიროვნულ კრიტიკას.
  4. ნაშრომის შინაარსი უნდა იქნეს გადმოცემული მესამე პირთა პერსონალური მონაცემის დაცვით.

მუხლი 18. მონაცემთა სიყალბე და პლაგიატი

  1. ნაშრომის გამოსაქვეყნებლად წარდგენა გულისხმობს ავტორის, როგორც შესაბამისი საავტორო უფლების მატარებელი პირის, დასტურს ნაშრომის  ავტორობასა და გამოყენებული წყაროების  აკადემიური  კეთილსინდისიერებით დაცვით აღნიშვნაზე.
  2. ავტორი უნდა აცნობიერებდეს მესამე პირის მოსაზრების, კვლევის ან პუბლიკაციის მითვისების ან შესაბამისი ციტირების გარეშე მათი გამოყენების (პლაგიატის) შედეგს.
  3. ავტორი ვალდებულია, ნაშრომში მცდარი ინფორმაციის/მითითების აღმოჩენის შემთხვევაში,  პირველი შესაძლებლობისთანავე  აცნობოს ჟურნალის  მმართველ  რედაქტორს,  რაც,  უკვე გამოქვეყნებული ნაშრომის შემთხვევაში, გამოიწვევს ჟურნალის მომდევნო ნომერში შესწორების (erratum) პუბლიცირებას, ხოლო გამოსაქვეყნებლად მომზადებული ნაშრომის არსებობისას ― მმართველი რედაქტორის გადაწყვეტილებით ნაშრომის შესწორებას ან მის პუბლიკაციაზე უარის თქმას.
  4. პლაგიატის იდენტიფიცირების მიზნით გამოსაქვეყნებლად წარდგენილი სამეცნიერო ნაშრომი მოწმდება თსუ-ის აკადემიური საბჭოს 2020 წლის 13 მაისის № 37/2020 დადგენილებით მიღებული „სსიპ ― ივანე ჯავახიშვილის სახელობის თბილისის სახელმწიფო უნივერსიტეტის აკადემიური კეთილსინდისიერების პოლიტიკის დოკუმენტის“ შესაბამისად და უნივერსიტეტის სასწავლო ბაზა “E-learning”-თან არსებული ანტიპლაგიატის პროგრამის - “Turnitin”-ის გამოყენებით.
  5. კვლევაში პლაგიატის აღმოჩენის შემთხვევაში, ნაშრომი აღარ ექვემდებარება რეცენზენტთა მიერ შეფასებას და  გამოქვეყნების საკითხის განხილვას.
  6. აკადემიური კეთილსინდისიერების დარღვევის ფაქტის ნაშრომის გამოქვეყნების შემდგომ აღმოჩენის შემთხვევაში, ავტორი თავად არის დაინტერესებულ პირთა წინაშე პასუხისმგებელი საქართველოს კანონმდებლობის შესაბამისად.

მუხლი 19. ეთიკურ დარღვევაზე რეაგირების წესი

საგამომცემლო საქმიანობაში ეთიკის წინამდებარე წესების სავარაუდო დარღვევის შესახებ დაინტერესებული პირი/ჟურნალის სარედაქციო ორგანო უფლებამოსილია  მიმართოს თსუ-ის ადმინისტრაციას დისციპლინური დარღვევის შემსწავლელი კომისიის შექმნის მოთხოვნით, რომლის საქმიანობა წარიმართება თსუ-ის შინაგანაწესისა და დისციპლინური პასუხისმგებლობის ნორმების საფუძველზე.